تابع/شاب من الصعيد
كتبهاbatta bakr ، في 23 أكتوبر 2007 الساعة: 09:13 ص
قلنا نكمل فهم
مع
شاب من الصعيد
بنت الاسلام: حمادة عندكم مسيحيين في الصعيد صح
حمادة: وكتار جداااااااااااااا
بنت الاسلام: دايما بنسمع عن ازمات بتحصل بين المسلمين
والمسيحين في الصعيد كتير جداا وبتولع حريقة تفتكر ايه هو
السبب واشمعني الصعيد بالذات دونا عن بقية محافظات مصر الي
بيحصل فيه الصراع ده
حمادة:على فكرة هاقولك حاجة عن شارعنا الشارع بتاعنا كله أقباط
ومش والله لحاجة من يومنا واحنا أخوات لدرجة أنه واحد من جيرانا
بيقول لماما يا ماما وناس محترمة جدا
بنت الاسلام: ده شيء رائع طب ليه الصراع ايه اسبابه الي بيفزع
الناس كل فترة ؟؟
حمادة:مفيش صراع هو اللى موجود مشاكل بتحصل بين ناس زى ما
بيحصل عند أى حد بس المشاكل لما بتكون ما بين نصراى ومسلمين
الدنيا بتخرب والسبب في كدة الحكومة
بنت الاسلام:يعني انت عاوز تقول انها في الاصل خلافات عادية
حمادة:اه والله خلافات عادية جدا فاكرة موضوع الكشح؟؟؟؟؟؟؟؟؟؟
بنت الاسلام:بصراحة لا
حمادة:الكشح القرية اللى المسلمين اتخانقوا مع المسحيين كانت سببها
انه واحد مسيحي مش مؤدب خلع النقاب من على وش واحدة مسلمة
راحت قامت الدنيا وناس كتير موتوا بعض يعني مشكلة عادية
بنت الاسلام: ليه الناس مافهمتهاش انه سوء خلق من شخص
ممكن جداا كانت تحصل من مسلم سيء الخلق برده يعني الموضوع في
الاول والاخر متعلق باخلاقيات
حمادة:اه هو كدة بس لما ده مسيحي وهى مسلمة الدنيا هاجت
بنت الاسلام: فهمتك ياحمادة حمادة انت قلت قبل كدة ان فيه
عادات وتقاليد اهل الصعيد متمسكين بيها جداا ومش ممكن تتغير
ممكن نعرف زي ايه العادات ديه؟؟
حمادة:زى أقولك مثلا عندنا لغاية دلوقتي متمسكين بموضوع العائلات
يعني الواحد لما بيجي يتجوز لازم يتجوز واحدة بنت عيلة
بنت الاسلام: من الصعيد يعني
حمادة: لا عادى من اى حتة بس بيدققوا اوى في موضوع العائلات
بنت الاسلام: حمادة الشاب الصعيدي بيحلم بايه
حمادة: زى اى شاب للأسف اول ما بيخلص بيفكر في الجواز وده زي
اى شاب بيفكر في كدة
بنت الاسلام:حمادة شايف الصعيد ازاي بعد عشرين سنة ايه الي
ممكن يتغير فيه؟؟
حمادة:بصراحة زى الأعلان لو عالشكل ممكن نغيره أما من جوه
مفيش تغيير الناس في الصعيد الحاجة اللى مش حلوة فيهم وأعتقد زى
كل المصريين السلبية وشيلان الهم
بنت الاسلام:حمادة انت فخور انك صعيدي ؟؟
حمادة: اه طبعا زى ما انا فخور انى مصرى
بنت الاسلام:حمادة بتتمني تسيب الصعيد وتروح القاهرة
؟؟ولا بتحلم تفضل طول عمرك في الصعيد بصراحة
حمادة:بصراحة اه
بنت الاسلام: ليه؟؟
حمادة:بس ليا اسبابي أولا انا هواياتي كلها موجودة فى القاهرة أنا
بهوى الصحافة والصحافة فى القاهرة وبهوى الكتابة والكتابة في
القاهرة وبحب الفن والفن في القاهرة
بنت الاسلام: ربنا يوفقك ياحمادة
حمادة:ربنا يخليكي
بنت الاسلام:حمادة الكلمات دي عند الصعيدي ماذا تعني بس
ياريت تلخص في كلمة واحدة
بنت الاسلام: الام
حمادة: كل حاجة في الدنيا
بنت الاسلام: الشرف
حمادة: هو الحياة نفسها
بنت الاسلام: الكرامة
حمادة: مرتبطة بالعايلةيعني أهانة فرد من عيلة بيدوس على كرامة
عيلة بحالها
بنت الاسلام: التار
حمادة: ما شفتوش
بنت الاسلام: الدم
حمادة: انا بخاف من دم الفرخة لما بتتدبح بكرهه جدا
بنت الاسلام: المرأة
حمادة:هى اختى وامى وعمتى وأهلى كلهم
بنت الاسلام: مصر
حمادة: مصر كل حياتي
بنت الاسلام: الصعيدي
حمادة:راجل طيب
بنت الاسلام: كدة وصلنا للنهاية ياحمادة بشكرك جدااا
حمادة: الحمد لله
بنت الاسلام: واتمني ان نكون قدرنا نوصل حاجة جيدة عن الصعيدي
واحب اختم بنكتة عن الصعايدة
حمادة: انا والله معارفش عندك قولى
بنت الاسلام: وانا كمان مش عندي خلاص نسيبها للمعلقين بكرر
شكري ليك وبتمنالك التوفيق ويارب تحقق كل احلامك وامانيك
حمادة: وانا كمان بتمنالك كل خير وتوفيق
بنت الاسلام: مع السلامة
حمادة:الله يسلمك
__________________________________________
و
انتهي الحوار
اتمني نكونقدرنا نقدم حاجة ونوضح مفاهيم عن اهل الصعيد الي بيمثلوا شريحة من اهم الشرائح في مصر
وتحية مني كبيرة جداا
http://hamadazedane.maktoobblog.com/?allLink=1
لحمادة زيدان
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
أكتوبر 23rd, 2007 at 23 أكتوبر 2007 4:47 م
بصراحة يات بطوط حوار جميل جدا جدا
و تنفعي مزيعة على فكرة
شمس الزناتي
أكتوبر 24th, 2007 at 24 أكتوبر 2007 10:51 م
حوار جميل
لكن اللى عايز اقوله
ان الصعيد شريحة من المجتمع المصرى
لهم نفس المشاكل ونفس الهموم التى يحياها بقية المصريين
وعندهم من الصفات الحميلة والنبيلة ما ليست عند الاخرين
وايضا توجد صفات سلبية
المجتمع المصرى كلةه يا فاطمة محتاج تغيير واصلاح
وطبعا الاصلاح بالتدرج
وان شاء الله قريبا يتغير نحو الافضل
أكتوبر 25th, 2007 at 25 أكتوبر 2007 6:14 م
شمس الزناتي
متشكرة جدااا علي كلامك الجميلة
وحقيقي نفسي اكون مذيعة
بس مش هينفع
تحياتي
بنت الاسلام
أكتوبر 25th, 2007 at 25 أكتوبر 2007 6:15 م
صلاح شنان
ربنا يقدرنا ونكون نواة جيدة تبتدي تغير
تحياتي
بنت الاسلام
أكتوبر 26th, 2007 at 26 أكتوبر 2007 7:06 ص
جميلة
على فكرة انا نسيت اقول لكم ان الغسيل بتاعنا اتسرق من على الحبل بالليل ,,, اكيد الحكومة هي اللي سرقته ,,,,, هههههههههه
هي اي حاجة تحصل نتهم الحكومة؟
احنا عاوزين نتهمها نتهمها في اشياء هي مذنبة فيها فعلا
تحياتي لكم من القلب
أكتوبر 26th, 2007 at 26 أكتوبر 2007 11:24 ص
ابو غزالة
والله معاك حق
الحكومة دي غلبانة قوي
ناقص كمان لوحد وقع منه ربع جنيه
يقول الحكووووووومة
منها لله بقي
تحياتي
بنت الاسلام
أكتوبر 28th, 2007 at 28 أكتوبر 2007 5:24 م
بنت الأسلااام..
موضوع بجد هايل
تسلمى يا قمر
والواد حماده كان منور
اخوكِ نيجــر