مين علي الباب يابت

 

يابت ردي مين علي الباب

 

الله   البت ديه جرالها ايه اتخرست

انتي يابت يامنيلة بقولك مين علي الباب

 

مالك يابت وشك مخطوف كدة ليه

مين الي جه  عفريت العلبة

ماتنطقي يابت مين واقف برة علي الباب

 

ال  ال 

ال مين انطقي

 

الحب

 

الحب ياستي

مين ياختي

الحب  حب ايه

والحب ده ايه ده  راخر

 

حب

وده جاي عندنا يهبب ايه  هو حد ناقصه

 

امشي يابت   شوفيه عاوز ايه

قال حب قال

حكم

 

مش راضي يمشي ياستي

تعالي بسرعة ياسيتي

تعالي 

 

اما اروح اشوف في ايه والنبي الظاهر البت ديه اتخبلت في عقلها

حب ايه وكلام فاضي ايه

 

اها

اها

ياسبحان الله

ايه الجمال ده كله

ده شكله يريح

 قوي ده  نازل من الجنة لزم ده ولا ايه

 

مالك يابني في ايه

انت تايه من مامتك ياحبيبي ولاحاجة

 لوتايه يا اخويا  نروحك ماتقلقش يعني وماتزعلش قوي كدة

انا الحب ياسيدتي

حب ايه يابني

انت تعبان ولاحاجة  اجيبلك دكتور لابجد لوتعبان يا اخويا ابعت اجيبهولك بسرعة اهدي بس كدة وارتاح 

 

انا الحب ياسيدتي

 

مش فاهمة ياخويا سايق عليك النبي تفهمني

ولاتقولي انت مين وعاوز ايه

 

اليس انتي السيدة جميلة

 

ياخرابي وده عرف اسمي منين ده كمان  اه اكيد  تلاقي البت المضروبة قالتله

ايوة يابني انا

 

اليس زوجك السيد جميل

 

لابقي ده الموضوع فيه ان  واخواتها كمان ده كمان عارف اسم الراجل ده تلاقيه مباحث  اه تلاقي المخفي عمل حاجة من عمايله السودا  هيودينا في داهية الله يكسفه

 

والله ما اعرفه ياحضرة الظابط

 

انا الحب ياسيدتي

 

اليس زوجك السيد جميل

 

ايوة يابني هو بس هنطلق قريب خلاص  وانا ماليش ذنب في أي حاجة عاوزين تاخدوه خدوه انا غلبانة وعندي عيال

 

 

انا الحب ياسيدتي

ايوة يابن عرفتانك اسمه ايه الحب   خير ان شالله

 

اليس ابناءك هم شمس وقمر

 

كمان عارف ولادي  يادي الخيبة المضاريب علي قلبهم دول هببوا ايه  والله لام قطعاهم بس لماييجوا

 

ايوة يابني هما  الي ينشكوا في قلبهم عملوا ايه

 

 

انا الحب ياسيدتي

 

بالصلاة عن النبي كدة عرفنا ياخويا انك الحب  عاوز ايه مننا ياسي حب  حد يابني عملك حاجة ابو العيال سرق منك حاجة ولا اتعرضلك قولي يابني ماتخبيش عليا

 

اجل ياسيدتي اساء الي كثيرا

 

قلتلي بقي اهو كدة يابني فاضحنا في كل حتة ربنا يفضحه فضيحة اللحمة في السوق  حقك عليا يابني امسحها فيا المرة ديه

 

وانتي ايضا ياسيدتي اساتي اليا كثيرا

 

انا لا بقي انت هتيجي تلبسني تهمة وانت واقف ولا ايه لاااا حكم انا بقولك ايه انا لحمي مر وما اتكلش اونطة انا  ياخويا لاعمري شفتك ولااعرفك اااه انت جاي ترمي بلاك علياهنا ولا ايه  لا حكم بقولك ايه

 

اسف لمقاطعتك ياسيدتي  ولكن اتسمحين لي بالحديث قليلا

ده ايه الادب ده ياخواتي هو في حد مؤدب  بالشكل ده في الزمن

 ده   عجايب

 

قول يا اخويا اتفضل عاوز تقول ايه قول الكلمتين الي واقفين في زورك لاتشرق وخلصنا

عندي شرط صغير للحوار ياسيدتي

هو كمان هيتشرط

قول    خير

لن اتحدث الا في حضور الجميع  انتي وزوجك وشمس وقمر

ليه هو اجتماع قمة طب استني هنا لما اخش ااقول لابو العيال

قوم ياراجل قوم  في ناس عاوزينك

ناس مين ياولية  الي جايين  الفجرية كدة

فجرية ايه يامدهول داحنا داخلين علي العصرية انت الي مش داري ما انت نايم متلقح لاوراك شغلة ولامشغلة 

انتي يابت يامنيلة روحي اندهي للعيال من تحت بسرعة اجري

حاضر ياستي 

ماقلتليش ياجميلة من الي علي الباب

ده سي الاستاذ الحب

مين ياختي حب ايه

انتي اتخبلتي

لا زي مابقولك كدة عاوز يتحاور معانا انا وانت والعيال

اها

واحنا فاضين  له  ده كمان

روحي دخليه علي ما اجي

طب خلص بسرعة خلينا نخلص من الضيف الرذل ده

ال حب  ال

 

اهو ياسي الاستانا الحب

جمعتلك العيلة كلها

ده جميل جوزي وديه البت قمر وده الواد شمس وانا اسم النبي حارسها وصاينها  جميلة

تحب اندهلك البت الشغالة كمان ولا علي ايه  حكم ديه بت لتاتة و  لكاكة وهتعملها حكاية في المنطقة ومش هنخلص

 

اتفضل يا اخويا سامعينك عاوز تقول ايه

ما  الذي سيقوله الحب؟؟

 

انا الحب

انا الحب الضائع المفقود

انا الحب التائه الغائب عن ضمائركم

انا الحب الذي اشتاق اليكم

انا الحب الذي اتعذب من اجلكم

انا الذي بايديكم  ذبحتموه

وفي قلوبكم  ابدتموه

ده ايه ياختي الي بيقوله ده والنبي ما انا فاهمة حاجة

اين انا

ياجميلة  بداخلك

 

وانت ايه الي يدخلك جوايا يابني 

اين انا

ياجميل بداخلك

 

بل اين انا بينكم

اين انا في تربيتكم لابنائكم

 من اكون في حياتكم

 

سؤالي لكم هل انتم سعداء

هل انت سعيد ياجميل  وانتي ياجميلة وياشمس ياقمر

لالالالالالالالالالالالا

والنبي عندك حق يابني قوله الكلام ده لاحسن معندوش احساس خالص 

لا بقي  قولها هي الكلام ده هي الي منكدة عليا عيشتي وعلطول مش عاجبها حالي ومصغراني قدام الي يسوي ومايسواش

انا ياراجل يا   انا  دانتا الي عاررني في وسط الحتة يامايل  لاشغلة ولامشغلة فالح بس  تبعزق القرشين الي سايبهوملك ابوك يمين وشمال علي الي يسوي ومايسواش ومعيشنا عيشة   بهدلة في بهدلة وقلة قيمة

 

لمي نفسك ياولية انتي  كمان قدام الناس وفي بيتي

بيتك   بيتك ايه يا ابو بيت هو ده بتسميه بيت ديه عشة الفراخ  انظف منه ده كفاية انك قاعد فيه  روح يا اخويا شوف البيوت البيوت عفش ايه وموبليا ايه  

 

والله لوماسكتي لها اعرفك قيمتك واخليكي عبرة قدام الناس

 

 انا هتخليني عبرة ياراجل يالمالكش لازمة انا يالي

 

كفااااااااااية

 ارحمونا بقي

ماما بابا بس  حرام عليكم ارحمونا كل يوم خناق كل يوم خناق انا مابقتش قادرة اتحمل ليه ليه بتعملوا فينا كدة انا كرهت نفسي وكرهت البيت وكرهت الدنيا كلها  حرام حرام

 

ايوة قمر معاها حق ارحمونا بقي  كل يوم تسمعوا علينا الجيران  والجيران تيجي تخلص انا بقيت مكسوف من نفسي ومن الناس ومن كل حد انا وقمر فكرنا كتير نهرب من البيت ده  نمشي من هنا ومعتوش تشفونا تاني

تهربوا ياشمس تهربوا يابني

ايوة يا امي نهرب صدقوني احنا تعبنا قوي  كرهتونا في الدنيا كرهنا الفلوس الي بتتخانقوا عليها كرهنا الدهب الي كل يوم نفسك فيه يا ماما كرهنا الاكل والشرب الي كل يوم تدلقوه علي بعض هو احنا مش من حقنا نعيش في هدوء واستقرار  انكتب علينا نعيش طول العمر كدة

حرام عليكم ارحمونا احنا تعبنا تعبنا  تعبنا

 لا ياولاد لا ماتقولوش كدة

انت السبب انت السبب يالي بتقول انك الحب

دخلت البيت ولعته شعللتها حريقة اخرج برة برة مش عاوزينك امشي 

لا ياماما لا ارجوكي سيبيه

خليه قاعد معانا

احنا محتاجينه

ماتسيبناش ياحب

ارجوك

علمنا معني الحب

عرفنا ازاي نحب بعض

ازاي نضحي علشان خاطر بعض

ازاي نكون اسرة متحابة

ارجوك ياحب  علمني ازاي اكون بنت محبة لبابا وماما واخويا ولكل اناس

علمني ازاي اكون قمر واخويا يكون شمس

انت الامل الاخير لينا

لوسيبتنا ومشيت

خدني انا واخويا معاك

في أي مكان

في أي زمان

مهما ان كان

لا ياقمر لا اهون عليكي ياحبيتي انا امك  الي خلفتك اهون عليكي تعملي فيا كدة لا يابنتي لا

تعبت يا امي

تعبت  

اهون عليكي ياقمر انا ابوكي ياقمر  الي انتي عنده اغلي حاجة في الدنيا انتي واخوكي

لا يابابا مش حقيقة

لوكنا غاليين عليكم

كنتم حسيتم بينا

كنتم فكرتم ازاي تسعدونا

كنتم عرفتم اننا زي أي اطفال بنحلم

بنحلم ب اب وام  بيحبوا بعض بيخافوا علي بعض علشان يقدروا يحبونا

لكن انتم مش كدة يابابا مش كدة

هنكون ياحبيبتي كدة

والله هنكون

شوفي بس انتم عاوزنا نعمل ايه واحنا هنعمله لكن ماتفكروش التفكير ده تاني

ماشي ياشمس ياحبيبي اوعوا تفكروا بالشكل ده تاني احنا غلطانين انا وابوكم غلطانين مش كدة ياجميل

ايوة ياجميلة احنا غلطانين سامحونا يا ولاد سامحونا

الدنيا خدتنا وطمع نفوسنا عمانا  والله  كانت قصة حبنا انا وامكم تتحكي في الافلام وبيتندر فيها في المجالس والقعدات لكن نسينا ضاع الحب بينا  لكن هنرجعه احنا مالناش غير بعض وغيركم هنرجعه تاني ياولاد نوعدكم

 

بجد ياماما

ايوة ياحبيبتي بجد

 

بجد يابابا

 

ايوة ياحبايبي بجد

جميل انا اسفة ياجميل علي كل حاجة وحشة  وعلي كل اساءة عملتها في حقك انا حقيقي ندمانة ياريت تسامحني  سامحني ياجميل

مسامحك  مسامحك  انا بحبك ياجميلة انا غلطت في حقك كتير انا اسف سامحيني سامحيني اوعدك اني هتغير  وهكون انسان تاني انسان تفتخري بيه انسان يشرفك يشرفكم كلكم

 

اندفع شمس وقمر ليرتموا في احضان جميل وجميلة   والفرحة لاتسعهم ودموع اعينهم تشهد علي  نقاء قلوبهم وعلي ندمهم  وعلي استعدادهم لبدء صفحة جديدة وسعيدة

 

واعتلت ابتسامة كبيرة المكان لتشمله بنسائم رقيقة من  الحب والعرفان

 

 

انتصر الحب